एला कईथें ग्रामीण पुलिसिंग: मड़वारानी दाई के दर्शन कर एसपी पहुंचिन बजार, लोगन मन ल कहिन परेशानी से डरहु झन हमन तुंहर रखवार

कोरबा(CGNEWS365.COM)/ 16 सितंबर 2021- गाँव म पुलिस के कइसे आदर व्यवहार हे एला जाने बर कोरबा के पुलिस कप्तान ह उरगा थाना क्षेत्र के गांव गांव जा के लोगन मन से पूछिस के कइसे हे तुंहर गाँव के हाल चाल, चोरी चकारी, गुंडा बदमाश तो तंग नई करे, थाना चौकी के कर्मचारी मन ठीक व्यवहार करथे, जिला पुलिस के बड़े साहब के मुँह ले छत्तीसगढ़ी भाखा ल सुन के लोगन मन बड़ा खुश होइन।

जिला पुलिस अधीक्षक कोरबा भोजराम पटेल ह बुधवार के  थाना उरगा क्षेत्र गांव के भ्रमण अउ कानून व्यवस्था के जानकारी लेकलेलेहे बर निकले रहिस, ए बखत ग्रामीण लोगन मन से गोठ बात करके ओमन मन के समस्या ल सुनिस अउ कानून व्यवस्था के जानकारी लिहिस।

छत्तीसगढ़ पुलिस के मुखिया डीजीपी श्री डीएम अवस्थी ह जम्म्मो पुलिस अधीक्षक मन ल मीटिंग म शहरी पुलिसिंग के संंग ग्रामीण पुलिसिंग म घलो जोर दे बर कहे हावे, बड़े साहब के कहे अनुसार पुलिस अधीक्षक श्री पटेल ह जम्मो थाना प्रभारी मन ल निर्देश के पालन करे बर आदेश करिस हे, निर्देश के पालन म पुलिस मन गांव म चलित थाना लगाके उही जगह समस्या ल निपटाय के काम करत हे।

बुधवार के पुलिस अधीक्षक कोरबा श्री भोजराम पटेल ह थाना उरगा के अंतर्गत गाँव मन के भ्रमण करे निकलिस। गांव म रुक-रुक के  ग्रामीण, स्कूली गुरुजी अउ सरकारी कर्मचारी मन ले पूछिस के कानून व्यवस्था, उरगा पुलिस थाना म पदस्थ पुलिस अधिकारी कर्मचारी मन के व्यवहार कइसे हे, कुछू शिकायत म तुरत कार्यवाही करथें की नही। माई लोगन के सुरक्षा, गांव म ठगी करे वाला गिरोह तो नई घूमत हे, सरकारी योजनाओं के फायदा मिलत हे कि नही, शिक्षा अउ स्वास्थ्य के हाल सहित कई जानकारी लिहिस।

एखर बाद मड़वारानी गाँव के साप्ताहिक बाजार पहुंचिस अउ बजार म गांववाला मन से खेती किसानी ,फ़सल के हाल चाल जानिस, एखर बाद पटेल साहब हर सब्जी भाजी बेचइया मन करा गोठ बात करके ओमन के सुख दुख जानिस अउ रमकलिया जेला भिंडी कइथे ओला छू के देखिस तेखर बाद साग भाजी बीसा के मड़वारानी दाई के मंदिर गिहिस अउ जम्मो झन खुशी खुशी रहै कईके आशीर्वाद मांगिस। ए बखत उरगा थाना के प्रभारी विजय चेलक अउ सहयोगी मन घलो साथ म रहिन।